Sguard 2015
  

Cars commembers ed intressents dalla Pro Siat

 

Cun quest scriver lein nus orientar davart la radunonza generala e las ulteriuras activitads da noss’uniun:

 

Sguard anavos silla radunonza generala da sonda, ils 21 da mars 2015

 

Nus havein giu plascher da beneventar numerus da nos commembers alla radunonza generala en Casa Sentupada ed engraziein per la fidonza demussada enviers la suprastonza.

 

Las lavurs el curtgin da reiver ein vegnidas terminadas igl onn 2014 culla montascha dad ina reit da protecziun encunter crappa. Il curtgin da reiver ei fetg populars, quei segiramein era perquei ch’el vegn menziunaus en diversa litteratura da reiver. Medemamein muossa quei la frequentaziun da nossa pagina d’internet: Lezza ei vegnida visitada rodund 3800 gadas duront igl onn vargau.

 

Igl ei fetg impurtont per nus da saver porscher in curtgin da reiver aschi segir sco pusseivel. Ord quei motiv vegn il grep controllaus mintg’onn la primavera dad ina persuna dil fatg.

Cordial engraziament a tut tgi che segida da mantener il curtgin da reiver e siu contuorn, seigi quei cun segar ni cun schubergiar la tualetta ella Friberga!

 

In bien resun ha era il concert da Nadal giu. Igl ei gartegiau da purtar in tec atmosfera dalla Tonhalle Turitg en baselgia S.Flurin.

 

Il quen annual ei vegnius menaus schuber e bein. Las contribuziuns annualas per mintga commembradi san vegnir mantenidas e ston buca vegnir alzadas.

 

Per rinforzar la suprastonza ei Pius Derungs vegnius elegius sco niev consuprastont.

 

Il vicepresident ha dau adia ad Ignaz Demarmels, igl initiant ed emprem president dall’uniun Pro Siat. Suenter in sguard anavos sils davos sis onns – l’uniun ei vegnida fundada ils 30-4-2009 – ha il vicepresident engraziau ad Ignaz per la lavur prestada cun surdar in canaster plein specialitads da Siat ed in bon per equipament da muntogna, per che Ignaz anfli el futur vinavon la via anavos a Siat. Per finir ha Ignaz aunc retschiert l’emprema “ediziun da nies Cudischet da Siat”, la quala tut ils presents han suttascret. Cordial engraziament a Ti Ignaz!

 

Pius Derungs ei il niev president dalla Pro Siat

 

Alla radunonza da suprastonza dils 3 da matg ei la suprastonza vegnida constituida da niev. Aschia ein ils uffecis vegni reparti ed organisai per part in tec auter. Pius Derungs ei staus promts da surprender igl uffeci da president. Cordial engraziament!

 

 

Lavur cumina da sonda, ils 9 da matg

 

Il di da lavur cumina ha gia giu liug. Cunquei ch’igl ei strusch stau pusseivel dad anflar in auter termin, havein nus decidiu dad organisar la lavur cumina ils 9 da matg. Per la buna e gronda lavur prestada in grond engraziament! Nus havein saviu far uorden el curtgin da reiver e sin Tuf. In rapport e zacontas fotografias ein d’anflar sin nossa pagina d’internet.

 

 

Cudischet

 

Las lavurs ein gia fetg avanzadas, aschia ch’igl ei planisau dad edir il cudisch silla fin da quest onn. Tut tenor con bein ch’ei gartegia da segirar la finanziaziun vegn il cudisch a cumpigliar entuorn 100 paginas cun numerusas fotografias.

 

Tgi che vul sustener quei project anfla cheu las indicaziuns per nies conto da banca:

 

Pro Siat, Denter Selvas 184 E, 7157 Siat

Banca Raiffeisen Surselva, 7130 Ilanz        CH07 8107 3000 0045 9180 3

 

 

Concert da Nadal 2015

 

Il concert da Nadal dad uonn ei gia organisaus. Ei vegn a dar in concert da gospel cull’enconuschenta cantadura Christina Jaccard che vegn accumpignada dil pianist David Ruosch. Igl onn 2012 ein ils dus musicists vegni premiai cul Swiss Jazz Award. Christina Jaccard ha gia concertau igl 1. da matg ell’ustria Rössli a Versomi.

 

El num dalla suprastonza engraziel jeu per Vies sustegn e per Vossa participaziun all’uniun. En special engraziel jeu a Pius Derungs ch’el ei staus promts da surprender il presidi dall’uniun.

 

Cordials salids


Theo Schaub, vicepresident Pro Siat

 

 


 

 

 

 

Suenter buna lavur cumina

ei nies curtgin da reiver puspei aviarts

 
 
IMG_2285.jpg [9 KB]IMG_2286.JPG [11 KB]
IMG_2293.jpg [12 KB]
   
IMG_2280.JPG [9 KB]
IMG_2288.JPG [11 KB]IMG_2290.JPG [11 KB]
   
IMG_2291.jpg [11 KB]
IMG_2283.jpg [8 KB]IMG_2275.JPG [11 KB]
   
IMG_2294.JPG [11 KB]IMG_2278.jpg [11 KB] IMG_2295.jpg [8 KB]
 
 
 

 



 

 


   

3. Concert el temps da Nadal

Gospel feeling cun Christina Jaccard und Dave Ruosch

 
Weihnachtskonzert_Flyer_2015_web.jpg [4 KB]
                 
   Weihnachtskonzert_Flyer_2015.pdf

 

IMG_0990.1.1.jpg [9 KB]
IMG_0986.1.1.jpg [12 KB]
IMG_9337.1.1.jpg [8 KB]
   
 IMG_9405.1.1.jpg [9 KB] IMG_9409.1.1.jpg [9 KB] IMG_9392.1.1.jpg [10 KB]
   
 IMG_2767.jpg [8 KB]IMG_2771.jpg [9 KB]
IMG_9403.1.1.jpg [10 KB]
   
IMG_9416.1.1.jpg [10 KB]
 IMG_9411.1.1.jpg [11 KB]IMG_9413.1.1.jpg [11 KB]
   
 IMG_9418.1.1.jpg [12 KB]IMG_2774.jpg [10 KB]
 IMG_9399.1.1.jpg [10 KB]
   
  
 

Nies tierz conzert el temps da nadal ils 28 da dezember ei stau in grond success. 175 persunas han anflau la dumengia sera la via tier nossa bein decorada baselgia St. Flurin a Siat. Il Fundament musical da Christina Jaccard e David Ruosch era il Swing ord New Orleans, il Soul ed il Blues. Il plascher dalla magnifica presentaziun ha animau tuts aspectaturs ad plirs stedis applaus.

Bugen engraziein nus a Gaby ed Nicoline Schaub per la organisaziun da quella excellenta presentaziun.

 

Dapli da Christina Jaccard sin

www.voicejaccard.ch.

 



 

 

Dapli sur dil rapport dalla suprastonza                                                      

Siat, advent 2015

         

Buna frequentaziun dalla plazza da giug e dil curtgin da reiver

Era uonn ein il curtgin da reiver e la plazza da giug puspei vegni frequentai stediamein. La purschida sin Tuf cun curtgin da reiver, plazza da giug, plaz da ballapei e fueina para dad esser ideala per famiglias. Specialmein engraziein nus alla vischnaunca da Glion che ha surpriu il manteniment dalla plazza da giug, dil plaz da ballapei e dalla tualetta.


Radunonza generala 2016
La radunonza generala ha liug sonda, ils 19 da mars 2016. Nus supplichein Vus da gia ussa reservar quei datum.

 

Nus engraziein a tut nos commembers, alla vischnaunca da Glion, a nos sponsurs e fauturs per lur beinvuglientscha e pil sustegn demussaus duront quei onn. Nus selegrein da seveser a caschun dil concert da Nadal ni digl apero da Daniev.

 

Nus giavischein a Vus in legreivel temps d’advent e bialas fiastas da Nadal.

 

Pius Derungs, president Pro Siat

 


Adressa  Pro Siat
 Via Clis 6
 CH-7157 Siat


Nos sponsurs
 
Impressum | Datenschutz | Vus essas cheu: Archiv » 2015