Briefkopf Mailings Batch.jpg [2 KB]

 

 


 
  
                    
  Concert el temps da nadal
  
  "Il bacio della voce"
  
  Musica festiva tier la fiasta dalla carezia
  
 Ovras da Mozart, Händel, Rossini, Strauss und andere...

 

 

                                      
 Bildschirmfoto 2018-10-30 um 21.13.47.jpg [20 KB]     
Bildschirmfoto 2018-10-30 um 21.10.38.jpg [19 KB]
  Anica Defuns
  Florian Pestell
  Sopranistia  Pianist

    
                           
 Flyer_Konzert_zum_Jahresausklang Front.jpg [4 KB] Flyer_Konzert_zum_Jahresausklang2 Kopie.jpg [4 KB] 
    
   Flyer Download.pdf  

 
 
                            

Dumengia ils 30. Dezember 2018
allas 17.00 uras
 en la baselgia catolica S. Flurin a Siat

  
 
 
                                             
Bigliets survegnis vus alla cassa d'intrada

commembers Pro Siat Fr. 25.–

bu commembers Fr. 30.–

affons ed giuvenils sut 16 onns gratuit
  
 
 
 
 

Rapport dalla suprastonza               
Siat, la fin da november 2018
   
Caras commembras e cars commembers dalla Pro Siat

Suenter ina biala, denton era schetga stad s'avischina plaunet igl unviern. E gia prest entscheiva il temps d'advent.
Per l'uniun Pro Siat finescha in onn che ha midau bia. Nus essan fetg leds che nus havein anflau, grazia al grond sustegn da biars commembers activs, ina fuorma che permetta da cuntinuar cun l'uniun Pro Siat.
 
Roschada en suprastonza
La mort tragica da Pirmin – che ha fatg part dalla suprastonza dalla Pro Siat naven da sia fundaziun il 2009 – ha era caschunau en nies gremi ina gronda largia. Cunquei che aunc ulteriurs consuprastonts havevan annunziau lur demissiun en vesta alla radunonza generala dil mars 2018, denter els era il president Pius Derungs, havein nus stuiu ir alla tscherca da novas soluziuns.
Nus engraziein a tut ils commembers dalla suprastonza ch'ein seretratgs per lur grond engaschi en favur da nossa uniun.

Reorganisaziun dall'uniun Pro Siat
Nus havein decidiu da reorganisar la suprastonza e d'optimar ils process interns. Da niev secumpona la suprastonza da treis persunas che collaboreschan cun differentas gruppas d'interess. Mintga sectur vegn delegaus en fuorma da project ad ina persuna responsabla che sa silsuenter agir a moda autonoma. Ils treis suprastonts valan sco persunas da contact per ils differents secturs e vegnan informai cuntinuadamein.
Era arisguard il contact cun nos commembers havein nus tscharniu ina varianta simplificada. Nus tarmettin perquei pli paucas informaziuns via e-mail ed il schaner survegnis Vus in rapport annual cumprimiu. Cordial engraziament per Vossa capientscha. Sulettamein aschia havein nus saviu garantir la primavera che l'uniun sa exister era egl avegnir.
Nus havein grond plascher da veser cun tgei anim ch'ils commembers voluntaris s'engaschan. In grond Dieus paghi a tuts – quei ei pil mument la suletta via da cuntinuar cun nossa uniun.

In cuort sguard retrospectiv sin il 2018
Era questa stad ha la Pro Siat saviu porscher, en collaboraziun cun la vischnaunca da Glion, als habitonts e visitaders da Siat in areal per il temps liber attractiv e bein mantenius cun il curtgin da reiver, il plaz da giug, il plaz da ballapei e la fueina. Tut nossas purschidas ein ordvart stimadas e vegnan nezegiadas stediamein. La fueina existenta ei vegnida cumpletada cun in'ulteriur gril e dus bauns. Cordial engraziament alla vischnaunca per quella donaziun. Deplorablamein han las fueinas buca saviu vegnir utilisadas pervia dil scamond da fiug.
La sablunera ed il niev trampolin han persuenter attratg fetg biars visitaders. Il tipi havein nus stuiu reveder, cunquei ch'el ei vegnius donnegiaus dallas nevadas digl unviern vargau. La proxima stad vegn el puspei prius en funcziun.
Nos dis da lavur cumina ein per tut ils participai adina danovamein in eveniment ordvart cuntenteivel. En quest liug admettel jeu in grond engraziel fetg a tut las persunas che han gidau a cultivar nies areal per il temps liber Tuf.

Il project "Sanar il stan da sittar" progredescha bein. Uonn havein nus saviu realisar ulteriuras lavurs internas grazia al sustegn da nos gidonters voluntaris. La cassa da reiver ei vegnida montada sin giavisch general sper l'entrada!

Nies project da pilot "La loipa da cuorsa liunga a Siat" va en ina nova fasa. Arno Spescha ha raquintau alla radunonza generala dil mars da sias experientschas dils emprems dus onns ed ha presentau sia idea da cumprar ina pintga maschina da far pista. Cun grond engaschi ha la gruppa d'interess saviu cumprar in vehichel d'occasiun adattau e reveder el ensemen cun gidonters voluntaris. Engraziel fetg – igl unviern sa entscheiver!

La tualetta da toitoi plazzada sin igl areal per il temps liber Tuf metta la vischnaunca era quest unviern puspei a disposiziun a nus. In cordial engraziament per igl agid.

Concert per la fin digl onn a Siat
Il sustegn da Gaby Schaub permetta a nossa uniun dad era organisar la fin dil 2018 in concert a Siat cun musicists singulars dalla Surselva. Il tema dalla sera da cant secloma: l'amur.
Nus lein possibilitar als commembers dalla Pro Siat da guder quei concert cun in prezi d'entrada reduciu.
Ulteriuras informaziuns davart quei concert ed ils artists anfleis Vus sil flyer aschuntau.

Il concert per la fin digl onn ha liug
dumengia, ils 30 da december 2018, allas 17.00, ella baselgia parochiala Sogn Flurin a Siat

Nus selegrein d'astgar beneventar biars visitaders a nies concert – perschuadi era Vossa famiglia e Vos amitgs da prender part a quella occurrenza festiva.

Apero da Daniev
Nus envidein bugen Vus e Vossas famiglias, tut ils habitonts e hosps da Siat agl apero da Daniev tradiziunal che ha liug
mardis, igl 1. da schaner 2019, dallas 16.00 tochen las 18.00, ella stizun dil vitg da Siat

Radunonza generala 2019
La radunonza generala 2019 ha liug sonda, ils 16 da mars 2019, allas 20.00, ella Casa Sentupada. Nus supplichein Vus da reservar gia oz quella data.

Cordial engraziament a tut nos commembers, fauturs e sponsurs, sco era alla vischnaunca da Glion per la beinvulientscha ed il sustegn duront igl onn che va plaunet a fin.
Nus selegrein da seveser il december a caschun dil concert e d'astgar far da Daniev in viva cun Vus sin igl onn niev.

Cun ils megliers salids per in pascheivel temps d'advent e bialas fiastas da Nadal


Monique Efinger, presidenta dalla Pro Siat


Adressa  Pro Siat
 Via Clis 6
 CH-7157 Siat


Nos sponsurs
 
Impressum | Datenschutz | Vus essas cheu: A casa